Mae teipograffeg yn fath o ddylunio y byddwn yn ei weld trwy’r amser, er enghraifft mewn cylchgronau, papurau newydd, taflenni, posteri, gwefannau a rhaglenni teledu. Mae cydbwysedd yn helpu i ddenu darllenwyr. Mae’n helpu hefyd i wneud yr ystyr yn fwy clir (mewn dyluniad anghytbwys, mae’n bosibl y bydd darllenwyr yn anwybyddu rhai rhannau o’r dudalen ac yn methu gwybodaeth bwysig).
Mewn dyluniad cymesur, mae gwrthrychau sydd ar bob ochr i’r dyluniad yn debyg iawn. Mewn dyluniadau anghymesur gellir creu cydbwysedd gweledol trwy drwch, lliw, siâp neu leoliad y gwrthrychau (eu ‘pwysau’ gweledol).
Un o’r dylunwyr llyfrau mwyaf diddorol yng Nghymru yw Olwen Fowler. Edrychwch ar y tudalennau o’i dyluniad ar gyfer The Tradition: A New History of Welsh Art 1400-1990 gan Peter Lord i weld sut yr ydych yn credu eu bod wedi eu cydbwyso.